ޒަމާނީ “ހައިބްރިޑް” ހަނގުރާމައިން ދަފަރާވުމަށް ބޭނުންވާ ފަންނީ ޢިލްމު އުނގެނުމަށް ނައިބު ރައީސް ގޮވާލައްވައިފި.
ޒަމާނީ “ހައިބްރިޑް” ހަނގުރާމައިން ދަފަރާވުމަށް ބޭނުންވާ ފަންނީ ޢިލްމު އުނގެނުމަށް ނައިބު ރައީސް ގޮވާލައްވައިފިއެވެ. ރައީސުލްޖުމްހޫރިއްޔާގެ ނައިބު އަލްއުސްތާޛް ޙުސައިން މުޙައްމަދު ލަޠީފް މިފަދައިން ވިދާޅުވީ ހުރަވީ ދުވަހުގެ ޤައުމީ ޖަލްސާގައި މިރޭ ވާހަކަފުޅު ދައްކަވަމުންނެވެ.
އެމަނިކުފާނުގެ ވާހަކަފުޅުގައި ވަނީ ކުރީ ޒަމާނުގެ ހަނގުރާމަތަކާއި މިހާރުގެ ހަނގުރާމަތައް ހިނގާ ގޮތުގެ ތަފާތުތަކަށް ބައްލަވައި، މިހާރުގެ ޙަމަލާތައް އަންނާނެ ގޮތްތަކާއި އެ ޙަމަލާތަކުން ޤައުމެއްގެ ފެންވަރުގައްޔާއި ފަރުދީ ގޮތުން ދިފާޢުވާނެ އުކުޅުތަކުގެ މައްޗަށް އަލިއަޅުއްވާލައްވާފައެވެ.
އިސްލާމީ މަރުކަޒުގެ ޖަލްސާ ކުރާ މާލަމުގައި މިރޭ ކުރިއަށް ދިޔަ މި ޖަލްސާގައި ނައިބު ރައީސް ވިދާޅުވީ ކުރީގެ ހަނގުރާމަމަތީ ހަތިޔާރުތަކުގެ ބަދަލުގައި، މިހާރު ކުރިއަށް ދަނީ “ހައިބްރިޑް” ހަނގުރާމަކަމަށާއި، މި ހަނގުރާމައިން ދަފަރާވެވޭނީ ފިކުރީ ގޮތުންނާއި ފަންނީގޮތުން ހުޝިޔާރުވެ ތިބެގެން ކަމުގައި ވިދާޅުވެފައެވެ.
“މިއަދު ވިސްނުންތަކާކުޅެ، ނަފުރަތާއި ރުޅިވެރިކަން އުފައްދަނީ އިންޓަނެޓުގެ ޒަރިއްޔާއިންދޭ ޙަމަލާތަކުން. ދޮގު މަޢުލޫމާތު، އިޤްތިޞާދީ ފިއްތުންތައް ކުރިމަތި ކުރުވުމާއި، ސިޔާސީ ހަލަބޮލިކަން އިތުރު ކުރުމާއި، ސަގާފީ ނުފޫޒުގެ ތެރެއިން ތޮޅެމުން ދަނީ ޤައުމުތަކުގެ ޤައުމިއްޔަތާއި އިޖުތިމާޢީ ފިކުރުތަކާއި އިޤްތިޞާދީ ތަޞައްވުރުތަކާ.” ނައިބު ރައީސް ވިދާޅުވިއެވެ.
މިފަދަ ހަނގުރާމައިގައި ފަތުރާ ދޮގު މަޢުލޫމާތުތައް އެތައް ޒަމާނަކަށް ދެމިގެންދާކަމަށާއި، މިފަދަ ޚަންޖަރުތަކުންވާ އިޤްތިޞާދީ ޒަޚަމްތަކަކީ ޤައުމު ބައިބައިވެ ޤައުމީވަންތަކަން ބަލިކަށިވެ، ރައްޔިތުންގެ މަދުގައި ޤައުމީ މަޞްލަޙަތާއީ އިތުބާރު ފުނޑު ފުނޑުވެ ދާއިމަށް ދެމިގެން ދާފަދަ ޙަމަލާތަކެއް ކަމުގައި ނައިބު ރައީސް ފާހަގަކުރެއްވިއެވެ.
މިފަދަ ޙަމަލާތަކާ ދެކޮޅަށް އަދުގެ ސަރުކާރުން ކުރައްވާ ކަންތައްތަކަށް އަލިއަޅުއްވާލައްވައި ނައިބު ރައީސް ވިދާޅުވީ، ދައުލަތުގެ މަޞްލަޙަތުން ފެށިގެން ޢާންމުންގެ މަޞްލަޙަތު ރައްކާތެރިކުރެއްވުމަށް އަދުގެ ރައީސް ޙިކުމަތްތެރިކަމާ އެކު މަސައްކަތްޕުޅު ކުރައްވާ ކަމުގައެވެ. އެގޮތުން ޒަމާނީ ގޮތުން ފަންނިއްޔާތަށް އަންނަ ހަލުވި ތަރައްޤީއާ އެއްވަރަށް ސައިބަރގެ ސަލާމަތީ ފިޔަވަޅުތައް ހަރުދަނާކުރައްވަމުން ގެންދަވާކަމުގެ ޔަޤީންކަން ނައިބު ރައީސް ވަނީ ދެއްވާފައެވެ. ސަލާމަތީ ކަންކަން ތަރައްޤީކުރައްވާ ހަރުދަނާކުރެއްވުމުގެ އިތުރުން، އެމަނިކުފާނު ގެންދަވަނީ ޤައުމީ މަޞްލަޙަތުވެރީންނާއި އެކުވެރިގުޅުންތަކާއެކު އުޚުއްވަތްތެރިކަމުގެ ވިއުގައެއް ޤާއިމުކުރައްވަމުންކަން ވެސް ނައިބު ރައީސް ފާހަގަކުރެއްވިއެވެ.
ނައިބު ރައީސް ދެކެވަޑައިގަންނަވާ ގޮތުގައި ދޮންބަންޑާރައިންނަށް އަދުގެ ޒުވާން ޖީލުން ޙަޤީޤީ ޝުކުރެއް އަދާކުރުވުނު ކަމަށް ވާނީ، ޒަމާނީ ގޮންޖެހުންތަކަށް ކުރިމަތިލުމުގެ ހުނަރުތައް ދޮސްކޮށްދިނުމަށް އަދުގެ ސަރުކާރުން މިކުރާ މަސައްކަތްތަކުގައި މިޖީލުން ޢަމަލާއި ބަހުން ޝާމިލުވެގެންކަމަށް ވެސް އެމަނިކުފާނު ވިދާޅުވިއެވެ.
3 ޖުމާދަލްއާޚިރާ 1446
4 ޑިސެންބަރު 2024
