ސިޔާސީ ގޮތުން އަންނަ ބަދަލުތަކުން އައިސްދާނެ ކުއްލި ނުރައްކަލަކަށް ހޭލާ ތައްޔާރުވެ ތިބެން ޖެހޭ – ރައީސް މައުމޫން
މިޒަމާނުގެ ސިޔާސީ އޮއިވަރަށް އަންނަ ބަދަލުތަކުގެ ސަބަބުން އައިސްދާނެ ކުއްލި ނުރައްކަލަކަށް ހޭލާ ތައްޔާރުވެ ތިބެން ޖެހޭ ކަމުގައި ނިޝާން ޢިއްޒުއްދީން ޢިއްޒަތުގެ ވެރިޔާ، ރައީސް އަލްއުސްތާޛް މައުމޫން ޢަބްދުލްޤައްޔޫމް ވިދާޅުވެއްޖެއެވެ.
ރައީސް މައުމޫން މިފަދައިން ވިދާޅުވީ ނަޞްރުގެ ދުވަހުގެ މުނާސަބަތުގައި ނޮވެންބަރު 3 ވަނަ ދުވަހުގެ ރޭ ދަރުބާރުގޭގައި ބޭއްވެވި ރަސްމީ ޖަލްސާގައި ވާހަކަފުޅު ދައްކަވަމުންނެވެ.
ރައީސް މައުމޫންގެ ވާހަކަފުޅުގައި ވަނީ 1988 ވަނަ އަހަރުގެ ނޮވެންބަރު މަހުގެ 3 ވަނަ ދުވަހު ދިވެހިރާއްޖޭގެ މިނިވަންކަމާއި ސިޔާދަތުގެ ދިފާޢުގައި ޝަހީދުވެވަޑައިގެންނެވި ސިފައިންގެ 8 ބޭކަލުންނާއި ޢާންމުންގެ 11 ޝާހީދުންގެ ޒިކުރާ އައު ކުރައްވާފައެވެ. އަދި ނަޞްރަކީ މާތް ﷲގެ ޙަޞްރަތުން ލިބުނު އެއްޗެއްކަން ހަނދާންކޮށް އިސްލާމީ ވަޙްދަތާއި ދިވެހީންގެ އެއްބައިވަންތަކަން ވަރުގަދަ ކުރުމަށް މިފަދަ ދުވަހެއްގައި ޢަޒުމް ކަނޑައެޅުމަށް ނަސޭޙަތްތެރިވެވަޑައިގެންނެވިއެވެ.
ރައީސް މައުމޫންގެ ވާހަކަފުޅުގައި ވަނީ ދިވެހިރާއްޖޭގެ މިނިވަންކަމާއި ސިޔާދަތު ރައްކާތެރިކުރެއްވުމަށްޓަކައި މި ސަރުކާރުން ގެންގުޅުއްވާ ހަރުދަނާ ސިޔާސަތުތަކަށް މަރުޙަބާ ވިދާޅުވެ، މި މޭރުމުން ކުރައްވާ އަގުހުރި މަސައްކަތްޕުޅުތަކަށްޓަކައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުއަށް ޝުކުރު އަދާކުރައްވާފައެވެ.
ރައީސް މައުމޫނުގެ ވާހަކަފުޅުގައި ވަނީ ނޮވެންބަރު 3 ހާދިސާއިން ލިބޭ ފިލާވަޅުތަކުން ޢިބްރަތް ޙާސިލް ކުރުމަށް ގޮވާލައްވާފައެވެ. އެގޮތުން ޒަމާނަށް އަންނަ ބަދަލުތަކާއި، ބަދަލުވަމުންދާ ސިޔާސީ އޮއިވަރުތަކާއެކު ވެސް ޤައުމީ ވަޙްދަތަށް އެއްވެސް ބަދަލެއް އައިސްގެން ނުވާނެކަން ފާހަގަކުރެއްވިއެވެ. 1988 ވަނަ އަހަރުގެ ނޮވެންބަރު 3 ވަނަ ދުވަހުގެ ޢުދުވާނީ ޙަމަލާއަށް ދިވެހި ޤައުމު ކުރިމަތިލީއިރު ސަރުކާރާމެދު ހިތްހަމަނުޖެހި ތިބި ބަޔަކު ތިބި ނަމަވެސް، އެންމެންވެސް ތިބީ ޤައުމެއްގެ ގޮތުގައި އެއްބައިވަންތަކަންމަތީގައި އެކަތިގަނޑެއްގެ ގޮތުގައިކަން ފާހަގަކުރެއްވިއެވެ. އެދުވަހު ދިވެހި ޤައުމު އޮތީ ހަނގުރާމައަކަށް ތައްޔާރުވެފައި ނޫން ކަމުގައި ވީނަމަވެސް، ދިވެހީންގެ ވަރުގަދަ ހިތްވަރާއި ނުގުޑާ ޢަޒުމް ކުރިއަށްނެރެ، ހަށިގަނޑާއި ފުރާނައިން ދީނާއި ޤައުމުގެ ޙައްޤުގައި ތިބިކަން މުޅި ޤައުމު ދައްކުވައިއިދިންކަން ފާހަގަކުރެއްވިއެވެ.
އެމަނިކުފާނުގެ ވާހަކަފުޅުގައި ވަނީ ފަލަސްޠީނުގެ ރައްޔިތުންނަށް ކުރިމަތިވެފައިވާ ލާއިންސާނީ އިންސަނީ ނަޞްލު ނައްތާލުމުގެ ހަނގުރާމައިން ސަލާމަތްކޮށްދެއްވުމަށް އެދި ދުޢާ ކުރުން މަތީ ދެމިތިބުމަށް އިލްތިމާސްކުރައްވާފައެވެ.
މިރަސްމިއްޔާތުގައި ދިވެހިރާއްޖޭގެ ޢިއްޒަތްތެރި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ އިތުރުން ރައްޔިތުންގެ މަޖިލިހުގެ ޢިއްޒަތްތެރި ރައީސް ޢަބްދުއްރަޙީމް ޢަބްދުﷲ އާއި އުއްތަމަފަނޑިޔާރު އަލްއުސްތާޛް މުޢުތަސިމް ޢަދުނާން ވެސް ބައިވެރިވެވަޑައިގެންނެވިއެވެ.
1 ޖުމާދަލްއައްވަލް 1446
3 ނޮވެންބަރު 2024
