ދިވެހިބަހާއި ސަގާފަތާއި ތަރިކައާ ބެހޭ ވުޒާރާ
މާލެ، ދިވެހިރާއްޖެ
ދިވެހީންގެ އެއްބަޔަކު އެނެއްބަޔަކާ އޮތް ހުރިހާ ގުޅުމެއްގެ އަސްލަކީ ދިވެހިބަސް – ވަޒީރު އާދަމް ނަޞީރު އިބްރާހީމް
ދިވެހީންގެ އެއްބަޔަކު އަނެއްބަޔަކާ އޮތް ހުރިހާ ގުޅުމެއްގެ އަސްލަކީ ދިވެހިބަސްކަމަށް ދިވެހިބަހާއި ސަގާފަތާއި ތަރިކައިގެ ވަޒީރު އާދަމް ނަޞީރު އިބްރާހީމް ވިދާޅުވެއްޖެއެވެ. އެމަނިކުފާނު މިހެން ވިދާޅުވީ މިއަހަރުގެ ބައިނަލްއަޤުވާމީ މާދަރީ ބަހުގެ ދުވަހުގެ މުނާސަބަތުގައި ދިވެހިބަހުގެ އެކެޑަމީން ބޭއްވި ޢިލްމީ ފޯރަމުގައި ވާހަކަފުޅުދައްކަވަމުންނެވެ. މި ފޯރަމް އޮތީ ދިވެހިރާއްގެ އިސްލާމީ ޔުނިވަރސިޓީގެ ޖަލްސާކުރާ މާލަމުގައެވެ.
މި ފޯރަމުގައި ވަޒީރު އާދަމް ނަޞީރު ދެއްކެވި ވާހަކަފުޅުގައި ވިދާޅުވީ، ދިވެހީން އުފެދެނީ ބަހުގެ ޒަރިއްޔާއިން އެކުލެވޭ އެކުލެވުންތަކަކުންކަމަށާއި، ދިވެހީންނަކީ ޤުުދުރަތުން ދިވެހީންނަށް ދެއްވާފައި އޮތް މާދަރީބަހަކުން ގުޅިފައިވާ އެއް ޢާއިލާކަމަށެވެ. އަދި ދިވެހީންގެ 4000 އަހަރުވީ ތާރީޚަށް ބަލާއިރު މި ޢާއިލާ ސަލާމަތް ކުރުމަށްޓަކައި އެތައް ކާބަފައިންނެއް ޤުރުބާންވެފައިވާކަމާއި، މި ޢާއިލާ ސަލާމަތްކުރުމަށްޓަކައި މިފަސްގަނޑު ބިނާކުރިކަމަށާއި ގެދޮރުބިނާކުރުމާއި އޮޑިދޯނިފަހަރު ބަނުންކަހަލަ އެތައް ފަންނުތަކެއްގައި ކުރިއަރައިދިޔަކަން ފެންނަން އޮތްކަމަށެވެ.
ވަޒީރުގެ ވާހަކަފުޅުގައި އިތުރަށް ވިދާޅުވީ، ދުނިޔޭގައި ވަކިދައުލަތެއް ލިބިފައި ނެތް ކިތަންމެ ޤައުމެއް ވާއިރު، ދިވެީންނަކީ އެނަސީބު ލިބުނު މަދުބައެއްގެ ތެރޭގައި ހިމެނުމުގު ފަޚުރުވެރިކަން އޮތް ދައުލަތެއްކަމަށެވެ. އެކަންއެހެން އޮތްއިރު، ދިވެހީންނަކީ ވަކި ގޮތަކަށް ތިބި ވަކި ބައެއްކަމާއި، މިއީ ދިވެހީންގެ ދައުލަތޭ ބުނާ ބުނުމަށް ބާރުދޭ އެންމެ މުހިންމު އަސްލަކީ ދިވެހީންގެ ފަޚުރުވެރި މާދަރީ ބަސް ކަމަށް ވެސް އެމަނިކުފާނު ވިދާޅުވިއެވެ.
ބައެއްގެ މާހައުލާއި މަސައްކަތްތެރިކަމާއި އެބައެއްގެ ބަސް އުފެދެމުންދިއުމާ އޮތް ގުޅުމުގެ މައްޗަށް އަލިއަޅުއްވާލައިވައި ވާހަކަފުޅުދައްކަވަމުން ވަޒީރު ވިދާޅުވީ، ބަހެއް ދަސްވަނީ އުޅޭއުޅުމެއްްގެ ތެރެއިންނާއި ސަގާފަތެއްގެ ތެރެއިން ކަމަށެވެ. ކުރިއަށް އޮތް ތަނުގައި ބަސް މުއްސަނދިކޮށް ކުރިއެރުވުމަށް މިއަދު ބޮޑެތިވަމުންދާ ކުދީންނަށް ގޭތެރެއިންނާއި ބޭރުންވެސް ރަނގަޅު މާހާއުލު ފަހިކޮށްދިނުން މުހިންމުކަމަށް ވަޒީރު ވިދާޅުވިއެވެ.
ދިވެހިބަހުގެ އެކެޑަމީން އިންތިޒާމު ކޮށްގެން ކުރިއަށް ގެންދިޔަ މި ފޯރަމުގައި ޑރ. އައިމިނަތު ރިޔާޒު ވަނީ އެކި ޢުމުރުފުރާގެ މީހުން ދިވެހިބަހުން ކުރާ މުޢާމަލާތުތައް ބަހުގެ ޢިލްމީ އުޞޫކުތަކާ ގުޅުވައިލުމުން ފެންނަ ނަތީޖާތަކުގެ މައްޗަށް ތައްޔާރުކުރައްވާފައިވާ ޢިލްމީ ދިރާސާއެއް ހުށަހަޅުއްވައިފައެވެ. މި ފޯރަމުގައި ދިވެހިބަހުގެ އެކެޑަމީގެ ބައެއް އިސްބޭފުޅުންގެ އިތުރުން ދިވެހިބަސް އުނގަންނައިދިނުމުގެ ދާއިރާގައި އުޅުއްވާ ބައެއް ބޭފުޅުންނާއި މަދަރުސާ ދަރިވަރުން ބައިވެރިވިއެވެ.
ދިވެހިބަހާއި ސަގާފަތާއި ތަރިކައާ ބެހޭ ވުޒާރާ
9 ޝަޢްބާން 1445
19 ފެބުރުވަރީ 2024
