“މީގެ 2 އަހަރު ފަހުން ފާހަގަކުރާނީ ދިވެހިރާއްޖެ އިސްލާމްވިތާ 900 އަހަރު ފުރުން” – ވަޒީރު

މީގެ 2 އަހަރު ފަހުން ފާހަގަކުރާނީ ދިވެހިރާއްޖެ އިސްލާމްވިތާ 900 އަހަރު ފުރުން ކަމުގައި ދިވެހިބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަޞީރު އިބްރާހީމް ވިދާޅުވެއްޖެއެވެ. ވަޒީރު މިފަދައިން ވިދާޅުވީ ދިވެހިރާއްޖެ އިސްލާމްވި ދުވަސް ފާހަގަކުރުމުގެ ގޮތުން މިއަދު ދަރުބާރުގޭގައި ބޭއްވި ރަސްމިއްޔާތުގައި މަރުޙަބާ ދެންނެވުމުގެ ގޮތުން ވާހަކަފުޅު ދައްކަވަމުންނެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ދެކަނބަލުން ބައިވެރިވެވަޑައިގެންނެވި މި ރައްސަމިއްޔާތުގައި ވަޒީރު އިތުރަށް ވިދާޅުވީ، ދިވެހިރާއްޖޭގައި މިހާރު ފާހަގަކުރަމުން މި ދަނީ އިސްލާމްވިތާ 800 ގެ އެންމެ ފަހު އަހަރުތައް ކަމަށާއި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ  މި ދައުރުގައި ދިވެހިރާއްޖެ އިސްލާމްވިތާ 900 އަހަރު ފުރުން ފަހަގަކުރާ ކުރުން ދިމާވާކަމީ އުފާވެރި އަދި ތާރީޚީކަމެއް ކަމުގައެވެ.

ރާއްޖެ އިސްލާމްވި ދުވަހުގެ ތާރީޚާއި ދިވެހި ސަގާފަތަށް އަލިއަޅުއްވާލައްވަމުން ވަޒީރުގެ ވާހަކަފުޅުގައި އިތުރަށް ވިދާޅުވީ، އިސްލާމްދީނަކީ ދިވެހީންގެ ދިރިއުޅުމުގެ ހުރިހާ ކަމެއްގައި އެންމެ އުހުގައި އޮތް، ދިވެހީންގެ ދިރިއުޅުމުގެ އެންމެ މުހިންމު ޙަޤީޤަތްކަމަށެވެ.

      “ދިވެހީންގެ ވިސްނުން ގުޅިފައިވަނީ އިސްލާމް ދީނުގެ ޙަޤީޤަތްތަކާ. ދިވެހީންގެ ހުރިހާ ޢަމަލުތައް، ދިރިއުޅުމުގެ އަސާސްތައް ފެށިގެން އަންނަނީ މާތް ވެގެންވާ އިސްލާމް ދީނުން.” ވަޒީރު ވިދާޅުވިއެވެ.

މީގެ އިތުރުންވެސް ވަޒީރު ވަނީ ދީނީ ކަންކަމަށް ދިވެހީން އިސްކަން ދިން މިންވަރާ ބެހޭ ގޮތުންނާއި ދީނީ ކަންކަން ދިވެހީންގެ ދިރިއުޅުމުގެ އެންމެ މުހިންމު ބަޔަށް ވެފައިވާ ގޮތުގެ މިސާލުތަކާއި ޙާދިސާތަކަށް ބައްލަވައި ވާހަކަފުޅު ދައްކަވާފައެވެ.

މި ރަސްމިއްޔާތުގައި ވަނީ ކީރިތި ޤުރްއާން ހިތުދަސްކޮށްފައިވާ ޙާފިޡުންނަށް މެޑައްޔާއި ހަނދާނީ ލިޔުން ދެއްވާފައެވެ. ޙާފިޡުންނަށް އިނާމު ޙަވާލުކޮށްދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެވެ. ކީރިތި ޤުރްއާން ހިތުދަސްކުރާ ޙާފިޡުންގެ އަގުވަޒަން ކުރައްވަން ފަށްޓަވައި ދައުލަތުގެ ފަރާތުން ޚާއްޞަ އިނާމެއް ދެއްވަން ފައްޓަވާފައި ވަނީ 2014 ވަނަ އަހަރުއެވެ.

2 ރަބީޢުލްއާޚިރު 1446

5 އޮކްޓޫބަރު 2024