މިއަހަރުގެ މިނިވަން ދުވަހުގެ ރަސްމީ ޝިޢާރަކީ “ދިވެހީންގެ އަމިއްލަވަންތަކަން, ދިވެހީންގެ މިނިވަންކަން” ކަމުގައި ރައީސުލްޖުމްހޫރިއްޔާ ކަނޑައަޅުއްވައިފި.
މިއަހަރުގެ މިނިވަން ދުވަހުގެ ރަސްމީ ޝިޢާރަކީ “ދިވެހީންގެ އަމިއްލަވަންތަކަން, ދިވެހީންގެ މިނިވަންކަން” ކަމުގައި ރައީސުލްޖުމްހޫރިއްޔާ ކަނޑައަޅުއްވައި އެކަން އިޢުލާން ކުރައްވައިފިއެވެ. މިކަން އިޢުލާން ކުރައްވާފައި ވަނީ މިއަދު ދިވެހިރާއްޖޭގެ އަޑުގެ ސެނެކޯ މާލަމުގައި ކުރިއަށް ދިޔަ މި ވުޒާރާގެ ނޫސްވެރީންގެ ބައްދަލުވުމުގައި ވާހަކަފުޅުދައްކަވަމުން ވަޒީރު އާދަމް ނަޞީރު އިބްރާހީމެވެ.
އެހެން އަހަރުތަކާ ޚިލާފަށް ސަރުކާރުން ވަނީ މިއަހަރު އެއް ހަފްތާގެ މުއްދަތަށް މިނިވަން ދުވަސް ފާހަގަކުރުމުގެ ހަރަކާތްތައް ކުރިއަށް ގެންދިއުމަށް ނިންމަވާފައެވެ. އެގޮތުން ހިންގުމަށް ހަމަޖެހިފައިވާ ހަރަކާތްތަކުގެ ތަފްސީލުތައް މިއަދުގެ ނޫސްވެރީންގެ ބައްދަލުވުމުގައި ވަނީ ހިއްސާ ކުރައްވާފައެވެ. މި ހަރަކާތްތަކުގެ ތެރޭގައި މިނިވަން ދުވަހުގެ ޚާއްސަ ޖަލްސާ ބޭއްވުމާއި, ދިދަ ނެގުމުގެ ރަސްމިއްޔާތާއި, ރައީސުލްޖުމްހޫރިއްޔާގެ ދެކަނބަލުން ބާއްވަވާ ރަސްމީ ބައްދަލުކޮށްލެއްވުމުގެ އިތުރުން, ހެވިކަމާއި ކުޅިވަރު, ފުޅަނދުބުރު, ކާނިވާ, މިނިވަން ދުވަހުގެ ހާއްސަ ދުވުން, ސާގާފީ ޝޯ އާއި ކާބޯތަކެތީގެ މައުރަޒު, ކުޑަކުދީންގެ ހަވީރު, ފިޔަވަތީގައި ތިބޭ ކުދީންނަށް ހާއްސަ ހަވީރު, އިސްރަށްވެހީންގެ ބައްދަލުވުން އަދި ސްޓޭޖް ޝޯތައް ވެސް ކުރިއަށް ގެންދިޔުމަށް ވަނީ ރާއްވަވާފައި ކަމުގައި ވުޒާރާއިން ވަނީ ފަހަގަކުރައްވާފައެވެ.
ޑރ. މުޙައްމަދު މުޢިއްޒުގެ ސަރުކާރުން ވަރަށްބޮޑު އިސްކަމެއް ދެއްވައިގެން ދިވެހިބަހާއި ސަގާފަތާއި ތަރިކައާ ބެހޭ ވުޒާރާގެ ޒިންމާތަކުގެ ތެރެއިން ކުރިއަށް ގެންދާ ދިވެހި ޤައުމިއްޔަތުގެ ހާއްސަ މަޝްރޫޢުގެ މުހިންމު އެއް ބަޔަކީ “އަމިއްލަވަންތަކަމެވެ”. މިއަހަރުގެ މިނިވަންދުވަހުގެ ޝިޢާރު ގުޅިފައި ވަނީ ޤައުމިއްޔަތުގެ މި މުހިންމު ސިފައާ އެވެ.
17 ޛުލްޤަޢިދާ 1445
25 މޭ 2024
