މިނިވަން ޤައުމެއްގެ ގޮތުގައި ދެމިއޮތުމަށް އެންމެ މުހިންމީ ޤައުމިއްޔަތު ނެގެހެއްޓުން: ނައިބު ރައީސް
މިނިވަން އަދި ތަހުޒީބު ޤައުމެއްގެ ގޮތުގައި އެތައްހާސް އަހަރަކަށް ދިވެހިރާއްޖެ ދެމިއޮތުމަށްޓަކައި އެންމެ މުހިންމުކަމަކީ ދިވެހި ޤައުމިއްޔަތު ނެގެހެއްޓުންކަމަށް ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް ވިދާޅުވެއްޖެއެވެ.
ނައިބު ރައީސް މިފަދައިން ވިދާޅުވީ ދިވެހި ޤައުމިއްޔަތުގެ އިސްވަރުގެ ފަރާތުން ކުރިއަށް ގެންދިޔަ “ކަޅުއޮށްފުންމި” މަހާސިންތާ ހުޅުވުމުގެ ރަސްމިއްޔާތު ޝަރަފުވެރިކޮށްދެއްވައި ވާހަކަފުޅު ދައްކަވަމުންނެވެ.
ދިވެހިރާއްޖޭގެ އިސްލާމީ ޔުނިވަރސިޓީގައި ކުރިއަށްދިޔަ “ކަޅުއޮށްފުންމި” މަހާސިންތާގައި ވާހަކަފުޅު ދައްކަވަމުން އެމަނިކުފާނު ވިދާޅުވީ ޤައުމިއްޔަތާމެދު ފަޚުރުވެރިވާ ބަޔަކަށް ހުރިހައި ދިވެހީންވެސް ވާންޖެހޭ ކަމަށެވެ.
ނައިބު ރައީސް ވިދާޅުވީ އެ މަހާސިންތާއިން ޤައުމިއްޔަތާ ގުޅުންހުރި އަދި ދިވެހީންގެ އަމިއްލަވަންތަކަމާ ގުޅުންހުރި ވަރަށް މުހިންމު ދާއިރާތަކުން އީޖާދީ ވިސްނުންތަކެއް ލިބިގެންދާނެކަމަށް ޔަޤީންކުރައްވާ ކަމަށެވެ.
“ދިވެހީންނަކީ ފަޚުރުވެރި ތާރީޚީ، ޒަމާންވީ އާދަކާދަތަކާއި ކާބާފައިންގެ ހީވާގި ދިރިއުޅުމާއި ދިވެހި ބަހުގެ ޗާލުކަންފަދަ އަޅުގަނޑުމެންގެ ޤައުމިއްޔަތުގެ ބަހާތަކަކީ، އަޅުގަނޑު ދެކޭގޮތުގައި ރާއްޖެއަށް ލިބިފައިވާ އިތުރު ޒީނަތްތެރިކަމެއްގެ ގޮތުގައި ދުނިޔެއަށް ހާމަކޮށްދޭން އެބަ ޖެހޭ. ރާއްޖޭގެ އަމާންކަން، ދިވެހީންގެ އެކުވެރިކަން، ޚުލްޤު ހެޔޮކަން، މި ޤައުމަށް އަންނަ ކޮންމެ ފަތުރުވެރިއަކަށް ޢަމަލީގޮތުން އަޅުގަނޑުމެން ދައްކަން އެބަ ޖެހޭ،” ނައިބު ރައީސް ވިދާޅުވިއެވެ.
އެމަނިކުފާނުގެ ވާހަކަފުޅުގައި ވަނީ ޤައުމިއްޔަތު ދިރުވުމަށް މި ސަރުކާރުން ކުރައްވަމުން ގެންދަވާ މަސައްކަތްތަކަށް އަލިއަޅުއްވާލައްވައިފައެވެ. އެގޮތުން ތަޢުލީމީ މަންހަޖުގައި ހިމަނާފައިވާ ޤައުމިއްޔަތުގެ މާއްދާއަށް އިޝާރާތް ކުރައްވަމުން ނައިބު ރައީސް ވިދާޅުވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެންމެ ސަމާލުކަން ދެއްވާ އެއްކަމަކީ ދިވެހީންގެ އަމިއްލަވަންތަކަމާއި ޤައުމިއްޔަތު ހިމާޔަތްކުރުން ކަމަށާއި އެ މާއްދާ އެގޮތަށް ހިމެނުމުގެ ސަބަބަކީވެސް އެއީ ކަމަށެވެ.
މި މަހާސިންތާއަކީ ދިވެހި ޤައުމިއްޔަތުގެ އިސްވަރުގެ ފަރާތުން ކޮންމެ އަހަރެއްގެ ދެ މޫސުމުގައި ބޭއްވުމަށް ހަމަޖެހިފައިވާ މަހާސިންތާއެކެވެ. އެގޮތުން އިއްޔެ ކުރިއަށް ދިޔައީ މިއަހަރުގެ ހުޅަނގު މޫސުމުގެ މަހާސިންތާއެވެ. މިފަދަ ޢިލްމީ ބައްދަލުވުންތައް އިތުރުކޮށް ކޮންމެ ނަކަތެއްގައި ވެސް ބޭއްވުމަށް ވަނީ ތާވަލުކޮށްފައެވެ. އިއްޔެ ކުރިއަށް ދިޔަ “ކަޅުއޮށްފުންމި” މަހާސިންތާގައި ވަނީ ޤައުމިއްޔަތުގެ ބަހާތަކުގެ މައްޗަށް ބިނާކޮށް ތައްޔާރުކޮށްފައިވާ ޢިލްމީ ކަރުދާސްތައް ހުށަހަޅާފައެވެ.
މި ރަސްމިއްޔާތުގައި ރައީސުލްޖުމްހޫރިއްޔާގެ ނައިބު ޙުސައިން މުޙައްމަދު ލަތީފަށް ދިވެހި ޤައުމިޔަތުގެ ދަރުބާރުގެ ރަމްޒު ވަނީ އަރުވާފައެވެ. މި ރަމްޒު އެރުވީ ބަހާ ބެހޭ ވަޒީރު އާދަމް ނަޞީރު އިބްރާހީމްއެވެ.
28 ޖުމާދަލްއޫލާ 1446
30 ނޮވެންބަރު 2024
