ވަޒީރު ށ އަތޮޅު ނަރުދޫ ކައުންސިލާ ބައްދަލު ކުރައްވައިފި
ދިވެހިބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަޞީރު އިބްރާހީމް ށ.އަތޮޅު ނަރުދޫ ކައުންސިލާ މިއަދު ބައްދަލު ކުރައްވައިފިއެވެ. މި ބައްދަލުުވުން އޮތީ ދިވެހިބަހާއި ސަގާފަތާއި ތަރިކައާ ބެހޭ ވުޒާރާގައެވެ. މި ބައްދަލުވުމުގައި ވަޒީރުގެ އިތުރުން ވުޒާރާގެ ބައެއް އިސްވެރިންވެސް ބައިވެރިވެވަޑައިގެންނެވިއެވެ. ނަރުދޫ ކައުންސިލާއެކު ބޭއްވުނު މި ބައްދަލުވުމުގައި އެކައުންސިލްގެ ރައީސާއި ކައުންސިލްގެ ބައެއް މެންބަރުން ބައިވެރިވެލެއްވިއެވެ.
މި ބައްދަލުވުމުގައި ނަރުދޫ ކައުންސިލުން ވަނީ ރަށުގައި ހުރި އާސާރީ ތަންތަނުގެ ޙާލަތާ ބެހޭ މަޢުލޫމާތު ވަޒީރާ ހިއްސާ ކޮށްފައެވެ. އަދި ވުޒާރާގެ މެންޑޭޓުގެ ތެރެއިން ނަރުދޫގައި ހުރި އާސާރީ ތަންތަން ރައްކާތެރިކުރުމަށް ކުރެވިދާނެކަންކަމާ މެދު މި ބައްދަލުވުމުގައި މަޝްވަރާކުރެވުނެެވެ.
ވަޒީރު އާދަމް ނަޞީރު އިބްރާހީމް މި ބައްދަލުވުމުގައި ދެއްކެވި ވާހަކަފުޅުގައި ވިދާޅުވީ ކިތަންމެ ކުޑަ އާބާދީއެއްްގައިވެސް ހުރިހާ ތަރިކައިގެ ބާވަތެއްވެސް ހުންނާނެކަމަށާއި، އެފަދަ ތަރިކަތައް ހޯދައި ދެނެގަތުމަށް ކުރެވިދާނެ މަސައްކަތްތަކެއް ހުންނާނެކަމުގައެވެ.
މި ބައްދަލުވުމުގައި މަޝްވަރާ ކުރެވުނު ބައެއްކަންކަމަށް އިޝާރާތް ކުރައްވައި ވަޒީރު ވިދާޅުވީ ބިމު އަޑީގައި ވަޅުލެވިފައިވާ ތަރިކަތަ ކޮނެ ހެދުމުން އޭގެ އަޞްލު ގެއްލުމަކީ އެކަށީގެންވާ ކަމެއްކަމަށެވެ. އަދި ތަރިކަ ޙިމާޔަތްކޮށް ރައްކާތެރި ކުރުމުގައި މިޒަމާނުގެ ވިސްނުމަކީ، ކޮންމެ އެއްޗެއްވެސް އަދި ތަނެއްވެސް އޭގެ އަސްލު ނުގެއްލޭ ގޮތަށް ބެހެއްޓުން ކަމަށާއި، ޒަމާނީ ވަސީލަތްތަކުގެ އެހީގައި އެފަދަ ތަކެއްޗާއި ތަންތަން ބެލޭނެ އިންތިޒާމު ހަމަޖެއްސުންކަމަށް ވެސް ވަޒީރު ވިދާޅުވިއެވެ. އަދި މިވުޒާރާގެ ވެސް މިހާރުގެ ވިސްނުމަކީ އެ ރަށެއްގައި އެ ރަށެއްގެ ދާރުލްއާސާރު ބިނާކުރުން ކަމަށްވެސް ވަޒީރު ވިދާޅުވިއެވެ.
ވަޒީރު އިތުރަށް ވިދާޅުވީ ރާއްޖެއަށް ޒިޔާރަތް ކުރާ ފަތުރުވެރިންގެ އެންމެ ބޮޑު ޝަކުވާއަކަށްވަނީ ދިވެހިންގެ މާޒީއާއި ދިވެހިން ރަށްރަށުގައި ވަޒަންވެރިވިގޮތް، އަދި ދިވެހިން ކުދި ރަށްރަށުގައި އެތައްހާސް އަހަރެއްވަންދެން ސަލާމަތުން ދިރިއުޅުނު ގޮތް އެނގޭނެގޮތެއް ނެތުންކަމުގައެވެ. އަދި ރަށެއް ކިތަންމެ ކުޑަޔަސް ފަތުރުވެރިކަމަށް އެ ރަށް ކުޑަނޫން ކަމުގައި ވަޒީރު ވިދާޅުވިއެވެ.
މީގެއިތުރުން ވަޒީރުވަނީ މާއްދީ އަދި މާނަވީ ތަރިކަ ހޯދާ ރައްކާތެރިކޮށް އޭގެ އަސްލު ނުގެއްލޭގޮތަށް ސަލާމަތްކޮށްދިނުމަށް ކައުންސިލްގެ ފަރާތުން އެދިވަޑައިގަންނަވާފައެވެ. އަދި އެކަމަށް ބޭނުންވާ ފަންނީ އެހީތެރިކަން ވުޒާރާގެ ފަރާތުން ފޯރުކޮށްދެއްވާނެކަމަށް ވެސް ވަޒީރު ވިދާޅުވިއެވެ.
ދިވެހިބަހާއި ސަގާފަތާއި ތަރިކައާ ބެހޭ ވުޒާރާ
25 ރަޖަބު 1445
6 ފެބްރުއަރީ 2024
