އެމްއެންޔޫގެ ދަރިވަރުންގެ ޔޫނިއަންގެ 11 ވަނަ ބަހުސް މުބާރާތުގެ ނަތީޖާ ފާޅުކުރުމުގެ ރަސްމިއްޔާތު ދިވެހިބަހާއި ސަގާފަތާއި ތަރިކައިގެ ވަޒީރު ޝަރަފުވެރިކޮށްދެއްވައިފި.
ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަންގެ 11 ވަނަ ބަހުސް މުބާރާތުގެ ނަތީޖާ ފާޅުކުރުމުގެ ރަސްމިއްޔާތު, ދިވެހިބަހާއި ސަގާފަތާއި ތަރިކައާ ބެހޭ ވަޒީރު ޝަރަފުވެރިކޮށްދެއްވައި ވަނަވަނައަށް އައި ޓީމުތަކާއި ދަރިވަރުންނަށް އިނާމު ހަވާލުކޮށްދެއްވައިފިއެވެ. މި ރަސްމިއްޔާތުގައި ވަޒީރުގެ އިތުރުން މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް އަދި އެމްއެންޔޫގެ ވައިސް ޗާންސެލަރ ޑރ. ޝެހެނާޒް އާދަމް ބައިވެރިވެވަޑައިގެންނެވިއެވެ.
މި ރަސްމިއްޔާތު ޝަރަފުވެރިކޮށްދެއްވައި ވަޒީރު އާދަމް ނަޞީރު އިބްރާހީމް ދެއްކެވި ވާހަކަފުޅުގައި މިރޭ ކުރެވުނު ފައިނަލް ބަހުސަކީ ދަރިވަރުން ވަރަށް ތައްޔާރުވެފައިވާ ބަހުސެއްކަން ފާހަގަކުރެއްވިއެވެ. ދަރިވަރުން ވާހަކަދެއްކީ ވަރަށް އިތުބާރާއި ޔަޤީންކަމާ އެކުގައި ކަމުގައި ފާހަގަކުރެއްވިއެވެ. އަދި ދިވެހިބަސް ދިރުވައި އާލާ ކުރުމަށް ކުރެވިދާނެ ކަންކަމާ ގުޅޭ ގޮތުން މިރޭ ކުރެވުނު ބަހުސްގައި ދަރިވަރުން ފާޅުކުރި ޚިޔާލުތަކަށް ވަޒީރު ތައުރީފު ކުރެއްވިއެވެ. ޤައުމު ބިނާ ކުރުމަކީ އިންސާނުން ބިނާ ކުރުންކަމަށް ވާއިރު, ޤައުމާމެދު ވިސްނުން އުފެއްދުމަށް އެންމެ މުހިންމު ކަމަކީ އަމިއްލަ ބަހަށް ދޭ އަހަންމިއްޔަތު ކަމާއި, އެބަހަށް އަންނަ ކޮންމެ ކުރިއެރުމަކީ ޤައުމީ ކުރިއެރުމެއްކަމަށް ގަބޫލުކުރާ ހިސާބަށް ދަރިވަރުންގެ ވިސްނުން ގެންދަން ޖެހޭ ކަމުގައި ވަޒީރު ވިދާޅުވިއެވެ.
ބަހުސަށް ތައްޔާރުވުމުގައި ދަރިވަރުން ވިސްނަންޖެހޭ ކަމެއްގެ ގޮތުގައި ފާހަގަކުރައްވައި ވަޒީރު ވިދާޅުވީ, ބަސްފޮތުން މައުޟޫޢު މާނަކުރާ ކުރުން ބަދަލުކޮށް, ޖުމްލަ ތެރޭގައި ލަފްޒު އޮންނައިރު އެ ލަފްޒުން ނެރެދޭ މާނައަށް ވިސްނައި ތައްޔާރުވުން ވަރަށް މުހިންމުކަމަށެވެ. މިގޮތަށް މައުޟޫޢު މާނަ ކުރާނަމަ, މައުޟޫޢަކަށްް އިންސާފު ކުރުމުގައި ގެންނަ ހެކިތަކަކީ މައުޟޫޢާ ގުޅޭ ނުވަތަ ނުގުޅޭ ބައިބައިކަން ކަނޑައަޅަން ފަސޭހަވާނެ ކަމުގައި ވަޒީރު ވިދާޅުވިއެވެ.
އަދި ބަހުސަށް ތައްޔާރުވުމުގައި ކަރުދާހާއި ބޯޑަށް ނުވަތަ ވަކި މީހެއްގެ ބަރޯސާވުމަށްވުރެ ޚިޔާލުކޮށްގެން އަމިއްލައަށް ވާހަކަ ބިނާކުރުމަށް އިސްކަން ދިނުމަށް ދަރިވަރުންނަށް ނަސޭހަތްތެރިވެވަޑައިގެންނެވިއެވެ.
މިރަސްމިއްޔާތުގައި މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު ވެސް ވަނީ ވާހަކަފުޅު ދައްކަވާފައެވެ. މިވާހަކަފުޅުގައި މެދުނުކެނޑި 11 އަހަރު މި މުބާރާތް މިހާ ކާމިޔާބުކަމާއެކު ކުރިއަށް ގެންދެވޭނީ މިކަމަށް ވަރަށް އިސްކަމަކާއި ޝައުޤުވެރިކަމެއް ހުރެގެން ކަމުގައި ދެކެވަޑައިގަންނަވާ ކަމުގައި ވިދާޅުވިއެވެ. މިރޭ މިކުރެވުނު ބަހުސްގެ ބައިވެރިންގެ ހުނަރު އާދާޔާ ޚިލާފަށް މޮޅުކަމަށް ފާހަގަކުރެވުނު ކަމުގައި ވެސް ވަޒީރު އަޙްމަދު ޝިޔާމް ފާހަގަކުރެއްވިއެވެ. އަދި މި މުބާރާތުގައި އެކި މައުޟޫޢުތަކުގެ ވަރަށް އިލްމީ ބަހުސްތަކެއް ފެނިވަޑައިގެންނެވިކަން ފާހަގަކުރައްވައި ވަޒީރު ވިދާޅުވީ, ވަކީން ހާއްސަކޮށް މަސްވެރިކަން އިތުރަށް ކުރިއެރުވޭނެ ގޮތްތައް އިވިވަޑައިގެންނެވި ބަހުސެއް މި މުބާރާތުގައި ކުރިއަށް ދިޔަކަމަށާއި, އެ ބަހުސްގައި އިވިވަޑައިގެންނެވި ބިނާކުރުވަނިވި ޚިޔާލުތައް އެ ވުޒާރާގެ މަސައްކަތްތަކުގައި ބޭނުންފުޅު ކުރައްވާނެކަމުގައި ވިދާޅުވިއެވެ.
މި މުބާރާތުގެ ފައިނަލް ބަހުސް ކުރިއަށް ދިޔައީ އެމްއެންޔޫގެ އޮޑިޓޯރިއަމްގައި, “ދިވެހިބަސް އިތުރަށް ދިރުވައި އާލާ ކުރެވޭނީ މަދަރުސާތަކުން” މި މައުޟޫޢަށެވެ. މިި ބަހުސްގައި ވާދަކުރީ ފެކަލްޓީ އޮފް ޝަރީޢާ އެންޑް ލޯ އާއި ސްކޫލް އޮފް މެޑިސިންއެވެ. ފައިނަލުގައި މި ދެޓީމު ވާދަކޮށް މުބާރާތުގެ އެއް ވަނަ ހާސިލްކޮށްފައިވަނީ ސްކޫލް އޮފް މެޑިސިން އެވެ.
މި ރަސްމިއްޔާތުގައި މުބާރާތުގައި ބައިވެރިވެފައިވާ ކޮންމެ ޓީމެއްގެ އެންމެ މޮޅު ބަހުސްކުރުންތެރިޔާ ވެސް ވަނީ ހޮވާފައެވެ. މުޅި މުބާރާތުގެ އެންމެ މޮޅު ބަހުސްކުރުންތެރިއަކަށް ހޮވިފައިވަނީ ފެކަލްޓީ އޮފް ޝަރީޢާ އެންޑް ލޯގެ މުޙައްމަދު އައިޝް މުޞްޠަފާއެވެ.
18 ޛުލްޤަޢިދާ 1445
26 މޭ 2024
